‘धूम ४’ मा शाहरुखको चर्चा

यशराज ब्यानरको हिट फ्रेन्चाइजी ‘धूम’ को चौँथो पार्टको स्टारकास्टलाई लिएर हरेक दिन विभिन्न खबर मिडियामा आइरहेको छ तर अहिलेसम्म कुनै आधिकारिक जानकारी निर्माण टिमबाट प्राप्त भएको छैन ।

एकपटक फेरि ‘धूम ४’ सँग जोडिएको एक ठूलो खबर बाहिर आएको छ । खबरअनुसार, यशराज फिल्म्स चाँडै चलचित्रको स्टारकास्टको घोषणा गर्ने तयारीमा छ ।

फिल्मफेयरको खबरलाई आधार मान्ने हो भने आमिताभ बच्चन र आमिर खान स्टारर चलचित्र ‘ठग्स अफ हिन्दोस्तान’ को फर्स्ट लुक रिलिज गरेपछि यशराज फिल्म्सले ‘धूम ४’ को स्टारकास्टलाई लिएर ठूलो खुलासा गर्दैछ ।

यो चलचित्रमा नेगेटिभ रोलमा सलमान खान नभएर शाहरुख खान देखिन सक्ने बताइएको छ । अहिले शाहरुख ‘जीरो’ को छायांकनमा व्यस्त छन् । यो चलचित्रपछि शाहरुखसँग हाल कुनै बिग प्रोजेक्ट छैन ।

‘जीरो’ पछि शाहरुख ‘धूम ४’ को सेट ज्वाइन गर्नसक्ने चर्चा छ । ‘धूम’ फ्रेन्चाइजीको पछिल्लो तीन चलचित्र बक्सअफिमा सुपरहित साबित भएको थियो । ‘धूम’ सिरिजको पछिल्लो चलचित्रमा यो भूमिका जोन अब्राहम, ऋतिक रोशन र आमिर खानले निभाएका थिए ।