१२ वर्षपछि सँगै काम गर्दै अजय र सैफ

बलिउड सुपरस्टार अजय देवगनले आफ्नै हो प्रोडक्शनबाट चलचित्र ‘तानाजी : द अनसंग वारियर’ बनाउँदैछ । यो चलचित्रको उनले गएको वर्ष नै घोषणा गरेका थिए ।

अजय चलचित्रमा तानाजीको भूमिकामा देखिनेछन् । ओम राउतले निर्देशन गर्ने ‘तानाजी’ को कहानी छत्रपति शिवाजी महाराजको कोली सेनाका प्रमुख तानाजी मालुसरेको जीवनको वरिपरि घुम्छ ।

खबरअनुसार, यस चलचित्रमा बलिउड अभिनेता सैफ अलि खान खलनायकको भूमिका देखिने प्रवल सम्भावना छ । अजय चाँडै यस चलचित्रको छायांकन सुरु गर्दैछन् ।

चलचित्रमा अभिनेत्री काजोलले अजयको श्रीमतीको भूमिका निर्वाहा गर्न सक्ने चर्चा छ । भारतीय मिडियाका अनुसार, खलनायकको भूमिकाका लागि सैफ अलीलाई अप्रोज गरिसकिएको छ ।

सैफ यस चलचित्रमा उदयभान राठौरको भूमिकामा देखिन सक्छन् । सैफ चलचित्र गर्न राजी भए अजय र उनी करीब १२ वर्षपछि एकै चलचित्रमा सँगै देखिनेछन् । यसअघि यी दुईले ‘कच्चे धागे’, ‘ओमकारा’ जस्ता चलचित्रमा काम गरेका छन् ।