चर्चित हास्यकलाकार तथा निर्माता किरण केसी (राता मकै) ले आफ्नो ६० औं जन्मदिनको अवसरमा नयाँ चलचित्र ‘दाल भात तरकारी’ को घोषणा गरेका छन् । यसलाई उनका छोरा सुदन केसीले निर्देशन गर्नेछन् ।
कमेडी जनराको यो चलचित्रको छायांकन भदौबाट सुरु हुने किरणले जानकारी दिए । गएको चैत ९ गते उनी निर्मित तथा अभिनीत चलचित्र ‘शत्रु गते’ बल्कबस्टर साबित भएको थियो ।
‘दाल भात तरकारी’ मह सञ्चारको ब्यानरमा किरण केसीले निर्माण गर्नेछन् । मदनकृष्ण श्रेष्ठ, हरिवंश आचार्य, दीपाश्री निरौलालगायतका केही कलाकार चलचित्रमा अनुबन्ध भइसकेका छन् । चलचित्रमा दीपकराज गिरीको इन्ट्री हुनसक्ने प्रवल सम्भावना रहेको खबर प्राप्त छ
किरण केसीको जन्मदिनमा हाँस्य ब्यङ्ग्य क्षेत्रमा योगदान पुर्याएको भन्दै कलाकार सन्तोष पन्तलाई र पत्रकार विदुर गिरीलाई सम्मान गरिएको थियो ।