फ्राईडे रिलिज : ‘सञ्जू’ सँग सविनको ‘ए सोल्टिनी’

फ्राईडे रिलिज अन्तर्गत यस हप्ताका लागि चलचित्र ‘ए सोल्टिनी’ प्रदर्शनमा आएको छ । योसँग भिड्न हलमा नयाँ नेपाली चलचित्र रिलिज भएका छैनन् ।

निमा तामाङ लामाको निर्देशनमा दिलकुमार घलान तामाङले निर्माण गरेको कमेडी कथानक फिल्ममा सबिन श्रेष्ठ, अर्जुन गुरुङ, जयनन्द लामा, मन्जु श्रेष्ठ, ज्ञानबहादुर जिम्बालगायतका कलाकारले अभिनय गरेका छन् ।

जिम्बा फिल्म प्रोडक्शनको ब्यानरमा निर्माण भएको चलचित्र बिश्वास भण्डारीले खिचेका हुन् । पूर्णी तामाङको प्रस्तुति रहेको चलचित्रलाई आरआर फिल्मस्ले बितरण गरेको छ ।

हलमा ‘ए सोल्टिनी’ एक्लै भने छैन । बलिउडको बहुप्रतिक्षीत चलचित्र ‘सञ्जू’ प्रदर्शनमा आएको छ । दरवारमार्गको क्यूज सिनेमाज बाहेक काठमाडौंका अन्य मल्टिप्लेक्समा प्रदर्शनमा नआएपनि यो चलचित्र देशभरका सिंगल थिएटरमा रिलिज भएको छ ।

नेपाल प्रदर्शन अधिकार पाएको चौधरी ग्रुप र गोपिकृष्ण मुभिजले प्रदर्शनका लागि नयाँ शर्त राखेपछि काठमाडौंका मल्टिप्लेक्स सञ्चालकले ‘सञ्जू’ प्रदर्शन नगरेका हुन् ।

प्राप्त जानकारी अनुसार, मल्टिप्लेक्सहरुले हप्ताको एक सहुलियत दरमा टिकट विक्री गर्ने गरेका छन् । यसबाट वितरकलाई सो दिन निकै कम सेयर हात पर्ने गर्दछ ।

तर, ‘सञ्जू’ को वितरक कम्पनी सीजीजीके सहुलियत दिन तयार नभएपछि चलचित्र मल्टिप्लेक्समा रिलिज नभएको हो । रणबीर कपूर स्टारर यस चलचित्रका निर्देशक राजकुमार हिरानी हुन् ।