चर्चित कोरियोग्राफर रेनाशा वान्तवा राई निर्देशित पहिलो चलचित्र ‘इन्टु मिन्टु लण्डनमा’ को टीजर सार्वजनिक भएको छ । बिहीवार राजधानीमा एक कार्यक्रमको आयोजना गर्दै निर्माण टिमले पत्रकारलाई देखाउँदै रोमान्टिक लभस्टोरीमा निर्मित चलचित्रको टीजर सार्वजनिक गरेको हो ।
टीजर कलरफूल बनेको छ । अभिनेत्री साम्राज्ञी राज्यलक्ष्मी शाह र डेब्यु ब्वाई धिरज मगर टीजरमा एकअर्काको तारिफ गरिरहेका छन् । टीजरमा चलचित्रको मेकिङ क्वालिटी उच्च देखिएको छ ।
साम्राज्ञीले ‘इन्टु मिन्टु लन्डनमा’ आफ्ना लागि विशेष रहेको बताइन् । ‘म कथा सुन्ने वितिक्कै सुटिङमा जान आतुर भएकी थिएँ । मैले अहिलेसम्म गरेको चलचित्रभन्दा यो धेरै फरक छ’, उनले भनिन् ।
यस्तै, नव-अभिनेता तथा चर्चित ब्लगर धिरज मगरले ‘इन्टु मिन्टु लण्डनमा’ आफूले खोजेको जस्तै चलचित्र रहेको बताए । निर्देशक रेनाशाले आफ्नो निर्देशकिय पाटोमा कोरियोग्राफी हाबी नभएको दाबी गर्छिन् । उनी यो चलचित्रलाई आफ्नो ‘ड्रिम प्रोजेक्ट’ बताउँछिन् ।
यसलाई प्रज्ज्वल समशेर जबरा र प्रभु समशेर जबराले संयूक्त रुपमा निर्माण गरेका हुन् । चलचित्रमा मिरा अर्थात् मिन्टुको भूमिकामा साम्राज्ञी, इशान अर्थात् इन्टुको भूमिकामा धिरज मगर प्रस्तुत छन् । आई कोर फिल्मस्को व्यानरमा निर्मित ‘इन्टु मिन्टु लन्डनमा’ का सह-निर्माताहरुमा सुलेखा राई, बसन्त तामाङ र सुष्मिता जिरेल रहेका छन् ।
चलचित्रको लेखकमा अभिमन्यु दिक्षित र रेनाशा रहेका छन् भने, आभास कर्माचार्यको संवाद रहेको छ । शैलेन्द्र धोज कार्कीको छायांकन रहेको चलचित्रमा टिसूजिल कर्माचार्य, हर्कुलस बस्नेत, स्वप्न सुमन र बसन्त सापकोटाको संगीत रहेको छ ।
प्रज्ज्वल समशेर जबरा र रेनाशाकै कथा रहेको चलचित्रमा साम्राज्ञी र धिरजसँगै शारुक ताम्राकार, दिलभुषण पाठक, विजय लामा, रुवी राणालगायत मुख्य भूमिकामा छन् । यो चलचित्र असोज ५ गतेबाट देशभर प्रदर्शनमा आउँदैछ ।
टीजर हेर्नुस् :-