‘नाईँ नभन्नू ल ५’ को फस्टलुक रिलिज

भाद्र ८ गतेलाई प्रदर्शन मिति कन्फर्म गरिएको बहुप्रतिक्षीत चलचित्र ‘नाईँ नभन्नू ल ५’ को फस्टलुक पोस्टर सार्वजनिक भएको छ । पोस्टरमा दुई जोडीलाई स्थान दिइएको छ ।

अभिनेत्री स्वस्तिमा खड्कालाई डेब्यु ब्वाई अभिषेक नेपालसँग देख्न सकिन्छ भने अनुभव रेग्मी अर्की डेब्यु कलाकार सेड्रिना शर्मासँग रोमान्टिक अवतारमा देखिएका छन् ।

निर्देशक विकास आचार्यले चलचित्रको कथा अनुसार फस्टलुक सार्वजनिक गरेको बताए । ‘नाईं नभन्नू ल ५ सदा झैं फेमली ड्रामा हो । तर यो सिरिजमा फेमली ड्रामासँगै लभस्टोरीलाई उत्तिकै स्थान दिएका छौं । पोस्टर यस्तै कथाको झझल्को हो’, निर्देशक आचार्यले भने ।

भदौ ८ गते रिलिज हुने चलचित्रमा दिलिप रायमाझी, निरुता सिंह, केकी अधिकारी, प्रियंका कार्की, स्वस्तिमा खड्का, जयनन्द लामा, बुद्धि तामाङ आदि कलाकारको अभिनय छ ।

यो चलचित्रबाट अभिषेक नेपाल र सेड्रिना शर्माले डेब्यु गरेका छन् । अभिषेकले स्वस्तिमाको जोडी भएर अभिनय गरेका छन् भने सेड्रिना अनुभवको जोडीको रुपमा देखिनेछन् ।

चलचित्रलाई विकास आचार्य र सामीप्यराज तिमल्सेना मिलेर लेखेका हुन् भने चलचित्रको छायांकन पुरुषोत्तम प्रधानले गरेका हुन् । बसन्त सापकोटाको संगीत रहेको चलचित्रलाई अर्जुन जिसीले सम्पादन गरेका छन् ।