चलचित्रको प्रचार गर्न र्‍याम्पमा शिव श्रेष्ठ

पुराना स्टार अभिनेता शिव श्रेष्ठ अभिनीत तथा निर्मित चलचित्र ‘एउटा यस्तो प्रेम कहानी’ को छायांकन हालैमा सकिएको छ । आउँदो भदौमा रिलिज हुने बताइएको यस चलचित्रको अघोषित रुपमा राजधानीबाट प्रचार सुरु गरेको छ ।

यसको सुरुवात हालै राजधानीमा सम्पन्न एक ‘फेशन शो’ बाट भएको छ । ‘स्टार अन दि रेड कार्पेट’ नाम दिइएको शोजमा दुई दर्जन बराबर मोडलहरुले बिरालोको चालमा र्‍याम्प नापे । जहाँ मुख्य आकर्षण बने अभिनेता शिव श्रेष्ठ ।

‘प्रोमोशनल इभेन्ट अफ एउटा यस्तो प्रेम कहानी’ सव टाइटलमा सम्पन्न शोज फिस्टेल मुभिजको आयोजनामा सम्पन्न भएको थियो । अमितेष कर्णको डिजाइनमा जोर्दोगी बुटिमको तर्फबाट तयार नेपाली संस्कृति झल्काउने, पश्चिमा भेषभुषा, पार्टी कलेक्सनसँगै विश्वकप फुटवल विशेष कलेक्सनमा मोडलहरुले र्‍याम्पमा उत्रिएका थिए ।

अभिनेता नरेन खड्का, अभिनेत्री रेखा फागो, बिष्णु चेमजोङ र बाल कलाकार संवेग दर्शनधारीले चलचित्रको तर्फबाट प्रस्तुति दिँदा गायक विश्व नेपाली, अस्मिता परियार, बिष्णु चेमजोङ, प्रज्वल नेपाली, राहुल नेपाली, रुशि नेपालीले गायनसँगै नृत्यद्वारा मनोरञ्जन प्रदान गरेका थिए ।

चलचित्र ‘एउटा यस्तो प्रेम कहानी’ लाई दिपेश सापकोटाले निर्देशन गरेका छन् । यसमा प्रियंका कार्की, आयुष्मान देशराज जोशी, बर्षा राउत, सञ्जोग कोईराला, शक्ति श्रेष्ठ, नरेन खड्का, कविता मानन्धर, रेखा फागोलगायत लिड अभिनयमा छन् ।