हलमा मलिना र मनिषको ‘तिमी हुन्छौ जहाँ जहाँ’

फ्राईडे रिलिज अन्तर्गत अभिनेत्री तथा पूर्वमिस नेपाल मलिना जोशी र अभिनेता मनिष सुन्दर श्रेष्ठ स्टारर चलचित्र ‘तिमी हुन्छौ जहाँ जहाँ’ देशव्यापी प्रदर्शनमा आएको छ ।

विकाश बस्याल निर्देशित यस चलचित्रको निर्मातामा मदन दवाडी, डालचन्द्र दवाडी र हरीप्रसाद अधिकारी रहेका छन् भने कार्यकारी निर्माता प्रकाश बाँस्कोटा हुन् । विना कार्की सह-निर्मात्रीमा छिन् ।

यसमा विश्व बस्नेत, तमन्ना केसी, गीता अधिकारीलगायतका कलाकारहरुको पनि अभिनय रहेको छ । माधव शर्मा घिमिरेको संवाद तथा पटकथा रहेको यस चलचित्रमा रोशन श्रेष्ठले द्वन्द्व निर्देशनको जिम्मेवारी सम्हालेका छन् ।

कविराज गहतराजको कोरियोग्राफी रहेको यस फिल्ममा रामशरण उप्रेतीको छायांकन, भुपेन्द्र अधिकारी र सालिक दुलालको सम्पादन, डेभिल भण्डारीको गीत रचना र अर्जुन पोखरेलको संगीत रहेको छ ।

यो चलचित्रसँग शुक्रवारबाट खासै प्रचार नगरिएको ‘एक्स्ट्रा माया’ नामक चलचित्र पनि हलमा लागेको छ । सोम कुस्कुमाझी निर्देशित यस चलचित्रमा सुस्मिता बुर्लाकोटी, अर्जुन खड्का, सनी सुनवार, सृष्टि भण्डारीलगायतको अभिनय छ ।