अभिनेत्री नीता ढुंगाना अब भोजपुरीको मार्केटमा प्रवेश गरेकी छिन् । उनको हातमा भोजपुरी सुपरस्टार निरहुवाको चलचित्र हात परेको छ । नाम नखुलाइएको चलचित्रमा दिनेशलाल यादव (निरहुवा) लिड रोलमा रहनेछन् भने नीता उनको अपोजिटमा देखिनेछिन् ।
नीता भन्छिन्, ‘पर्सिबाट चलचित्रको छायांकन नेपालबाट सुरु हुँदैछ । स्क्रिप्ट चित्त बुझेर चलचित्र गर्न राजी भएकी हुँ ।’ उनले पहिलो पटक भोजपुरी सुपरटारसँग काम गर्न लागेकोमा खुसी व्यक्त गरिन् ।
उनले चलचित्रमा आफ्नो भूमिकाको विषयमा जानकारी दिन निर्माण टिमबाट अनुमती नभएको बताइन् । उनी चलचित्रमा आफ्नो भूमिका कमजोर नभएको बताउँछिन् ।
उनका अनुसार, उक्त चलचित्रको नेपाल र भारतमा छायांकन हुनेछ । केही दिनमै एक कार्यक्रमका बीच बाँकी कलाकार र निर्देशकको नाम सार्वजनिक गर्ने तयारीमा निर्माण टिम रहेको बताइएको छ ।
यसअघि भोजपुरी स्टार निरहुवाले नेपाली चलचित्रका द्वन्द्व निर्देशक चन्द्र चन्त निर्देशित भोजपुरी चलचित्र ‘निरहुवा चलल लन्डन’ मा काम गरिसकेका छन् ।