हलमा हिट होला मलिना र मनिषको ‘तिमी हुन्छौ जहाँ जहाँ’ ?

अभिनेत्री तथा पूर्वमिस नेपाल मलिना जोशी र ‘रानी’ फेम अभिनेता मनिष सुन्दर श्रेष्ठ अभिनीत नयाँ चलचित्र ‘तिमी हुन्छौ जहाँ जहाँ’ असार ८ गतेबाट हलमा लाग्दैछ । यसअघि यो जोडीले चलचित्र ‘रानी’ मा सँगै काम गरेका थिए ।

गीतसंगीत र ट्रेलरको लोकप्रियताले ‘तिमी हुन्छौ जहाँ जहाँ’ बक्सअफिसमा हिट हुने आँकलन फिल्मी पण्डितहरुको छ । अब यो त चलचित्रको कन्टेन्टले नै निर्धारण गर्नेछ । मलिना र मनिष पनि चलचित्र सफल हुनेमा विश्वस्त छन् ।

डेब्यु चलचित्र ‘रानी’ असफल भएका कारण मनिषका लागि ‘तिमी हुन्छौ जहाँ जहाँ’ हिट हुन अत्यन्त जरुरी छ । उता मलिनाले दर्जन बढी चलचित्रमा काम गरेपनि अझैसम्म आफ्नो सूचीमा हिट चलचित्रको नाम लेखाउन सकेकी छैनन् ।

यसकारण दुवैका लागि यो चलचित्र महत्वपूर्ण छ । अब यी दुईको हिट कलाकार हुने सपना यो चलचित्रले पूरा गर्ला वा नगर्ला ? यसको भने प्रतिक्षा गर्नैपर्ने छ ।

युवापुस्ता लक्षित यो चलचित्रका निर्देशक विकाश बस्याल हुन् । फिल्मको कथा पनि उनकै हो । यो चलचित्रले सेन्सर बोर्डबाट ‘पिजी सर्टिफिकेट’ प्राप्त गरेको छ ।

अब ‘तिमी हुन्छौ जहाँ जहाँ’ हेर्न १६ वर्ष उमेर मुनीकाले अभिभावक लिएर जानु पर्नेछ । मदन दवाडी, डालचन्द्र दवाडी र हरीप्रसाद अधिकारी निर्माता रहेको चलचित्र यसका कार्यकारी निर्माता प्रकाश बाँस्कोटा हुन् । विना कार्की सह-निर्मात्रीमा छिन् ।

यसमा विश्व बस्नेत, तमन्ना केसी, गीता अधिकारीलगायतका कलाकारहरुको पनि अभिनय रहेको छ । माधव शर्मा घिमिरेको संवाद तथा पटकथा रहेको यस चलचित्रमा रोशन श्रेष्ठले द्वन्द्व निर्देशनको जिम्मेवारी सम्हालेका छन् ।

कविराज गहतराजको कोरियोग्राफी रहेको यस चलचित्रमा रामशरण उप्रेतीको छायांकन, भुपेन्द्र अधिकारी र सालिक दुलालको सम्पादन, डेभिल भण्डारीको गीत रचना र अर्जुन पोखरेलको संगीत रहेको छ ।