‘छक्का पञ्जा ३’ मा स्वस्तिमा पनि

दीपाश्री निरौलाको निर्देशनमा हाल धमाधम छायांकन भइरहेको चलचित्र ‘छक्का पञ्जा ३’ अभिनेत्री अभिनेत्री स्वस्तिमा खड्काको पनि प्रवेश भएको छ । मुर्हूतमा कलाकार तथा निर्माता दीपकराज गिरीले ठट्टा गर्दै स्क्रिप्टमा फुच्ची अभिनेत्री चाहिएको हुँदा स्वस्तिमालाई अटाउन नसकेको बताएका थिए ।

यतिबेला यो चलचित्रको पोखरामा छायांकन चलिरहेको छ । स्वस्तिमाले शनिवारबाट सुटिङ ज्वाइन गरिसकेकी छिन् । चलचित्रको केही दृश्यसँगै एक गीतमा उनलाई देख्न पाइने निर्देशक दीपाश्री निरौलाले जानकारी दिइन् ।

उनको दृश्य खिचिसकेपनि गीतको छायांकन भने बाँकी छ । स्वस्तिमाको इन्ट्री भएसँगै दर्शकमा फिल्मप्रति थप कौतुहलता बढेको छ । चलचित्रको असार पहिलो साताबाट सुटिङ सकिने बताइएको छ ।

दशैंको फूलपातीबाट प्रदर्शनमा आउन लागेको यो चलचित्रमा दीपकराज गिरी, दीपिका प्रसाईँ, जीतु नेपाल, केदार घिमिरे, बुद्धि तामाङ, नीर शाह, किरण केसी, संयोग कोइरालालगायतका कलाकारहरुको अभिनय रहनेछ । ‘छक्का पञ्जा ३’ मा अभिनेत्री प्रियंका कार्की अतिथी भूमिकामा देखिनेछिन् ।