मलिना ‘मिस नेपाल यूएस २०१८’ को प्रशिक्षकमा नियूक्त

अमेरिकाको टेक्सस राज्यमा हुने छैठौँ ‘मिस नेपाल यूएस २०१८’ को आधिकारिक प्रशिक्षकमा सन् २०११ की मिस नेपाल तथा अभिनेत्री मलिना जोशी नियूक्त भएकी छिन् ।

टेक्ससको ड्यालसमा आगामी अगस्ट १९ ,२०१८ आइतबारका दिन हुने उक्त कार्यक्रमको लागि मलिनालाई छनौट गरिएको आयोजकले जानकारी दिएका छन् ।

सन् २०१४ मा पनि मिस नेपाल यूएसको आधिकारिक प्रशिक्षक बनिसकेकी मलिनालाई दोश्रो पटक पुनः आयोजक संस्थाले नियुक्त गरेको हो । मिस नेपाल यूएस २०१८ को बिजेतालाई $ ५ हजार डलरको अध्ययनको लागि छात्रवृत्ति प्रदान गरिने छ ।

प्रतियोगिताका लागि नेपाली मूलका १८ देखि २९ बर्षका युवतीहरु प्रतियोगितामा सहभागिता लिन पाउने छन् । उक्त प्रतियोगिताको आवेदन खुला भएकोले प्रतियोगीहरुले निवेदन दिन सुरु गरि सकेका छन् । जुन २३ तारिख दरखास्त दिने अन्तिम म्याद रहेको छ ।