असार ८ गतेबाट देशव्यापी प्रदर्शनमा आउन लागेको लभस्टोरी चलचित्र ‘तिमी हुन्छौ जहाँ जहाँ’ ट्रेलर सार्वजनिक गरिएको छ । बिहीवार राजधानीमा एक कार्यक्रमका बीच निर्माण टिम र कलाकारको उपस्थितिमा प्रेम र विछोडको कथा बोल्ने ट्रेलर सार्वजनिक गरिएको हो ।
ट्रेलरमा अभिनेता मनिष सुन्दर श्रेष्ठ र अभिनेत्री तथा पूर्वमिस नेपाल मलिना जोशीलाई निकै स्क्रिन स्पेस दिइएको छ । यो जोडीले यसअघि चलचित्र ‘रानी’ मा एकसाथ काम गरेका थिए । पूर्ण रुपमा लभस्टोरी कथामा निर्मित बताइएको यस चलचित्रका निर्देशक विकाश बस्याल हुन् । कथा पनि उनकै हो ।
मदन दवाडी, डालचन्द्र दवाडी र हरीप्रसाद अधिकारी निर्माता रहेको फिल्म ‘तिमी हुन्छौ जहाँ जहाँ’ का कार्यकारी निर्माता प्रकाश बाँस्कोटा हुन् । विना कार्की सह-निर्मात्रीमा छिन् ।
ट्रेलर रिलिज कार्यक्रममा उपस्थित अभिनेता मनिष र अभिनेत्री मलिना दुवैले चलचित्र सरल लभस्टोरीमा निर्माण भएपनि दर्शकलाई पूर्ण मनोरञ्जन दिने दाबी गरे ।
यसमा स्वरुप पुरुष ढकाल, रबी गिरी, विश्व बस्नेत, तमन्ना केसी, गीता अधिकारीलगायतका कलाकारहरुको पनि अभिनय रहेको छ । माधव शर्मा घिमिरेको संवाद तथा पटकथा रहेको यस चलचित्रमा रोशन श्रेष्ठले द्वन्द्व निर्देशनको जिम्मेवारी सम्हालेका छन् ।
कविराज गहतराजको कोरियोग्राफी रहेको चलचित्रमा रामशरण उप्रेतीको छायांकन, भुपेन्द्र अधिकारी र सालिक दुलालको सम्पादन, डेभिल भण्डारीको गीत रचना र अर्जुन पोखरेलको संगीत रहेको छ । निर्देशक बस्याले चलचित्र ‘तिमी हुन्छौ जहाँ जहाँ’ पैसा असुल चलचित्र रहेको बताए ।
ट्रेलर हेर्नुस् :-