अभिनेत्री ऋचा शर्माले बिहीवार आफू अभिनीत तथा निर्मित हरर चलचित्र ‘सुनकेसरी’ को सिक्वेल निर्माण गर्ने घोषणा गरेकी छन् । बिहीवार साँझ छाँया हलमा आयोजना गरिएको यस चलचित्रको प्रिमियरमा उनले यस्तो उद्घोष गरेकी हुन् ।
सिक्वेलका लागि ठाउँ बाँकी राखेका कारण चाँडै ‘सुनकेसरी- २’ लिएर आउने उनले वाचा गरेकी छन् । यो चलचित्रले शुक्रवारबाट देशभरका हलमा प्रदर्शन सुरु गरेको छ ।
मल्टिप्लेक्समा उच्च शोज पाएको यस चलचित्रले देशभर करीब ७० बढी ‘स्कृन’ पाएको छ । सोलो रिलिजमा आएको यसले बक्सअफिसमा सुखद नतिजा ल्याउने फिल्मी पण्डितहरुको आँकलन छ । उक्त चलचित्रको मल्टिप्लेक्समा अग्रिम बुकिङ आक्रामक छ ।
प्रिमियरमा ‘सुनकेसरी’ लाई सुखद प्रतिक्रिया मिलेको छ । करिश्मा मानन्धर, कर्मा शाक्य, विपिन कार्कीलगायतले चलचित्रको तारिफ गरे ।
यस चलचित्रमा ऋचाका अलावा भीम न्यौपाने, रबिन्द्र झा, सुनिल पराजुली, तमन्ना शर्मालगायतका कलाकारहरुको अभिनय छ । ऋचाले अष्ट्रेलियामा बस्दै आएका भीम न्यौपानेसँगको सहकार्यमा यो फिल्म निर्माण गरेकी हुन् ।
उक्त चलचित्रमा अष्ट्रेलियन दरबार बुटिक होटलका पहिलो पाहुना र भुतप्रेतबीचको गतिविधीलाई मुख्य कथा बनाइएको छ । चलचित्रमा शर्मिला सापकोटा र धर्मराज अधिकारी सह-निर्माताको रुपमा छन् भने कार्यकारी निर्माताको रुपमा मनोज अधिकारी छन् ।