जेठ १८ गतेबाट देशव्यापी प्रदर्शनमा आउने तरखरमा रहेको चलचित्र ‘बेबि आई लभ यू’ फरक खालको प्रेम महशुस गराउने निर्देशक जनक पाण्डे दाबी गर्छन् । उनी भन्छन्, ‘यो चलचित्रले आदर्श प्रेम सिकाउँछ । मायालाई शब्दमा मात्र सिमित राख्नु हुन्न भन्ने बुझाउँछ ।’
चलचित्रमा समरको भूमिका निर्वाहा गरेका नव-नायक सन्तोष खड्गीले ‘बेबि आई लभ यू’ मा फरक प्रेम कहानी प्रस्तुत गरिएको बताउँछन् । चलचित्रको वान लाइन स्टोरी समेत आफैंले लेखेका उनी भन्छन्, ‘समर र सायराको प्रेम फरक अन्दाजको छ । यसमा प्रेमको फरक-फरक रुप देखाइएको छ । कथा नै यस्तो छ कि जो कोहीँको आँखा रसाउँछ ।’ उनले सेटमा संवाद बोल्दै गर्दा धेरै पटक भक्कानिएको पनि सम्झिए ।
सन्तोषले चलचित्रको केही पाटो आफ्नो जीवनसँग मेल खाने पनि खुलाए । यस्तै, पर्दाकी सायरा उर्फ नव-नायिका पूजा तिवारीले ‘बेबि आई लभ यू’ ले दर्शकलाई निराश नबनाउने बताइन् ।
उनी भन्छिन्, ‘यो चलचित्र एकपटक मात्र हेरेर अघाउन्न । चलचित्रले मायाको परिभाषा बुझ्न मद्दत गर्नेछ । एकपटक प्रेम बुझ्न भएपनि हलसम्म जान आग्रह गर्छु ।’ उनले समर र सायराको जोडीलाई दर्शकले अर्को चलचित्रमा पनि हेर्ने इच्छा व्यक्त गर्ने बताइन् ।
सन्तोष र पूजासँगै यसमा सरोज खनाल, निर्मल शर्मा, राजु कमेडी, रेशम बुढाथोकी, अप्सन पन्थीलगायतको पनि अभिनय छ ।
लिची इन्टरटेन्मेन्ट प्रा.लि.को ब्यानरमा शिव न्यौपाने निर्मित उक्त चलचित्रमा सिर्जना परियार र दुर्गा पाण्डे सह–निर्मातामा रहेका छन् । यो चलचित्र सुरज आचार्यले खिचेका हुन् ।