यस वर्षको बहुप्रतिक्षीत चलचित्र ‘क्याप्टेन’ मा अन्य दुई चर्चित कलाकारको आगमन भएको छ । युवा स्टार अनमोल केसीको प्रमुख भूमिका रहने चलचित्रमा उपासना सिंह ठकुरी, प्रियंका एमभी, सरोज खनाल, प्रशान्त ताम्राकारसँगै सुनिल थापा र विल्सन विक्रम राई (तक्मे बुढा) को पनि इन्ट्री भएको छ ।
‘ऐश्वर्य’ फेम निर्देशक दीवाकर भट्टराईले निर्देशन गर्ने यस चलचित्रको आइतबारबाट दोस्रो चरणको सुटिङ सुरु भएको छ । पहिलो चरणको सुटिङ भने गएको हप्ता इलाममा दुई दिन चलेको थियो । अहिले दमकको एक खेल मैदानको चलचित्रको छायांकन भइरहेको छ ।
यस चलचित्रमा सुनिल थापाको केमियो भूमिका रहने स्रोत बताउँछ । खबरअनुसार, उनी राष्ट्रिय फुटबल प्रशिक्षकको भूमिकामा देखिनेछन् । सुनिल थापाले ‘क्याप्टेन’ ज्वाइन गर्न अनमोलसहितको टिमसँग दमक उड्दै गर्दाको तश्बिर सामाजिक सञ्जालमा शेयर गरेका छन् । यस चलचित्रको निर्मातामा भुवन केसी छन् ।
पूर्वको एउटा सानो गाउँबाट राष्ट्रिय फुटबल खेलको विजेतासम्म बनेका एक युवकको संघर्षको कथा चलचित्र ‘क्याप्टेन’ ले बोल्नेछ । अनमोल यसमा पहिलो पटक फुटबल खेलाडीको भूमिकामा देखिँदैछन् ।