अभिनेत्री रेखा थापाले आफ्नो निर्देशन र निर्माणमा चलचित्र ‘मालिका’ को सुटिङ आरम्भ गरेकी छिन् । जाजरकोटकी १४ वर्षीय बालिका कमला ओलीलाई प्रमुख भूमिकामा लिँदै सोमबारबाट चलचित्रको छायांकन सुरु भएको हो ।
सोमबार बिहान पशुपतिमा पूजाआजा गर्दै रेखाले बालुवाटारबाट यस चलचित्रको छायांकन सुरु गरेकी हुन् ।
छायांकनको पहिलो दिन रेखा र नर बहादुर कार्कीले बालुवाटारमा आउट डोर सट भएको मुख्य सहायक निर्देशक नवराज आचार्यले जानकारी दिए । चलचित्रको काठमाण्डौंमा करीब १० दिन सुटिङ चल्नेछ ।
राजधानीपछि ‘मालिका’ को कोहलपुर र जाजरकोटमा छायांकन हुनेछ । रेखाको आफ्नै कथा रहेको चलचित्र व्यक्तिको सोच परिवर्तनको विषयमा आधारित रहेको छ ।
चलचित्रमा रामशरण उप्रेतीको छायांकन र सुरेश अधिकारीको संगीत छ । रेखाले ‘मालिका’ लाई लक्ष्मीपूजा कात्तिक २१ देखि प्रदर्शनमा ल्याउने जानकारी दिइन् ।