अभिनेता अनमोल केसीको प्रमुख भूमिका रहने नयाँ चलचित्र ‘क्याप्टेन’ दर्शकमाझ थप प्रतिक्षीत बनेको छ । चलचित्र ‘ऐश्वर्य’ मा सर्वाधिक रुचाइएका अभिनेता प्रशान्त ताम्राकारको यस चलचित्रमा ईन्ट्री भएको छ ।
निर्देशक दीवाकर भट्टराईले ‘क्याप्टेन’ मा प्रशान्तलाई अनुवन्धित गरेको जानकारी दिए । उनले प्रशान्तको भूमिकाको विषयमा भने बोल्न चाहेनन् ।
बुझिएअनुसार, उनी यस चलचित्रमा पनि नेगेभिट रोलमा देखिनेछन् । उनी नेपाली चलचित्रमा ‘ह्यान्डसम भिलेन’ का रूपमा चिनिँदै आएका छन् ।
गएको आइतवार पूर्वको इलाममा भएको ‘माइभ्याली गोल्डकप’ मा ‘क्याप्टेन’ को तीन दिन सुटिङ गरिएको थियो । केही दिनमा चलचित्रको दोस्रो चरणको सुटिङ सुरु हुँदैछ ।
अनमोलले उक्त चलचित्रमा एक फुटबल खेलाडीको भूमिका निर्वाहा गर्दैछन् । पूर्वको एउटा सानो गाउँबाट राष्ट्रिय फुटबल खेलको विजेतासम्म बनेका एक युवकको संघर्षको कथा चलचित्र ‘क्याप्टेन’ ले बोल्नेछ ।
भुवन केसी यसको निर्मातामा रहेका छन् । उक्त चलचित्रमा अनमोलको उपासना सिंह ठकुरी र प्रियंका एमभीसँग जोडी बाँधिएको छ । यसमा सरोज खनाल पनि लिड रोलमा छन् ।