भोली शुक्रवारबाट दोस्रो हप्तामा प्रदर्शन सुरु गर्न लागेको चलचित्र ‘कोहलपुर एक्सप्रेस’ टिमले केक काटेर सफलताको खुसीयाली साटासाट गरेको छ ।
हलिउडको सुपरहिरो चलचित्र ‘एभेन्जर्स : इन्फीनिटी वार’ को वर्चश्वका बीच पनि नेपालमा सुखद कलेक्सन गरेको भन्दै बिहीवार निर्माण टिमले एक कार्यक्रमका बीच सक्सेस केक काटेर खुसीयाली मनाएको छ ।
केक काट्दै गर्दा निर्मात्री तथा अभिनेत्री केकी अधिकारीले ‘कोहलपुर एक्सप्रेस’ ले एक हप्तामा एक करोडको कलेक्सन गरेको जानकारी दिइन् । उनी भन्छिन्, ‘कति कमायो भन्ने कलेक्सनको संख्याभन्दा पनि हामीले गरेको मेहनत दर्शकले रुचाइदिनु भयो । त्यही नै हाम्रो लागि सफलता हो ।’
चलचित्रको सेलिव्रेसन कार्यक्रममा केकीसँगै निर्देशक विशाल भण्डारी, अभिनेत्री द्वय प्रियंका कार्की, ऋचा शर्मा, वाल कलाकार कुशाग्र भट्टराई, अभिनेता विनोद न्यौपानेलगायत उपस्थित थिए ।
अर्जुन तिवारीको छायांकन रहेको यस चलचित्रमा केकीसँगै भद्र बहादुर शाही, देवी लाल न्यौपाने पण्डित र शिव प्रसाद चौलागाई निर्माताका रुपमा रहेका छन् ।