‘हिरोज्’ को नयाँ प्रदर्शन मिति घोेषणा

अन्ततः बैशाख २८ गते अभिनेत्री करिश्मा मानन्धर अभिनीत चलचित्र ‘हिरोज्’ प्रदर्शनमा आउने भएको छ । एक्सन, लभ, कमेडी तथा संवेदनाले भरिएकोे यो चलचित्र पहिला चैत्र २३ मा प्रदर्शन हुने तयारीमा थियो । तर, प्राबिधिक कारण देखाउँदै अन्तिम समयमा प्रदर्शन स्थगित गरियो ।

अब भने आफ्नो चलचित्र बैशाख २८ मा दर्शकमाझ आउने पक्का भएको जानकारी निर्मात्री पूर्णिमाले दिएकी छिन् । यो मितिमा सलोेन बस्नेत र कबिर खड्का स्टारर चलचित्र ‘लम्फू’ पनि रिलिज हुँदैछ ।

‘हिरोज्’ मा मुकेश ढकाल, जयकिसन बस्नेत, पूर्णिमा लामा, संजोग राणा, दिलकृष्ण श्रेष्ठ, सहिन प्रजापति, दिनेश डिसीलगायतका कलाकारले अभिनय गरेका छन् ।

जयलक्ष्मी फिल्मस्को ब्यानरमा निर्मित ‘हिरोज’ को प्रस्तुतकर्ता लक्ष्मी लामा हुन् भने निर्मातामा युवराज लामा, शेखर लामा र संजोग राणा रहेका छन् । शिब ढकाल र रामशरण उप्रेतीले खिचेको चलचित्रमा शंकर महर्जनको द्वन्द्व, कमल राई, कबिराज गहतराज र रामजी लामिछानेको कोरियोग्राफी छ ।

चलचित्रप्रति आफू निकै आशावादी रहेको पूर्णिमा बताउँछिन् । चलचित्रमा बेरोजगारीको पीडा, महिला हिंसा, राजनीतिक विकृती, अन्याय बिरुद्धको आवाजका साथै प्रेमकथा प्रस्तुत गरिएको छ । एनबि महर्जन चलचित्रका निर्देशक हुन् ।