‘नाईं नभन्नू ल ५’ मा अभिनेत्री निरुता सिंहले अभिनय गर्ने भएकी छिन् । बिहीवार राजधानीमा सम्पन्न ‘छैठौँ एनएफडिसी अवार्ड’ मा सहभागी हुन मुम्बईबाट काठमाडौं आएकी उनले अब यस चलचित्रमा काम गर्दैछिन् ।
शनिवार र आइतवार यस चलचित्रको काठमाडौंमा छायांकन हुँदैछ । यसमा उनले बाल कलाकार अनुभव रेग्मीको आमाको भूमिका निर्वाहा गर्दैछिन् । निर्देशक तथा निर्माता विकासराज आचार्यले चलचित्रमा निरुताको भूमिका राम्रो रहेको बताए ।
लामो समयदेखि छोटै भएपनि राम्रो भूमिका पाएको खण्डमा फिल्ममा काम गर्ने निरुताले बताएकी थिइन् । बुझिएअनुसार, ‘नाईं नभन्नू ल ५’ को स्क्रिप्ट उनलाई औधि मन परेको छ ।
भदौ ८ गतेलाई प्रदर्शन मिति तय गरिएको चलचित्रमा प्रियंका कार्की, केकी अधिकारी, दीलिप रायमाझी, अनुभव रेग्मी, सेड्रिना शर्मा, अभिषेक नेपाल, स्वस्तिमा खड्कालगायतका कलाकारहरुको लिड रोल छ ।
विकास आचार्य र सामीप्यराज तिमल्सेनाको लेखन रहेको फिल्मलाई पुरुषोत्तम प्रधानले खिचेका हुन् । फिल्मको संगीत बसन्त सापकोटाले तयार पारेका छन् ।