ऋषिराज आचार्य निर्देशित तथा निर्मित चलचित्र ‘ड्रिम गर्ल’ को प्रदर्शन मिति फेरबदल भएको छ । असार २९ गतेलाई तोकिएको यस चलचित्रको प्रदर्शन मिति अब असोज १९ गतेलाई तय गरिएको छ ।
नयाँ प्रदर्शन मिति घोषणा सँगै चलचित्रको फस्टलुक पोष्टर पनि सार्वजनिक गरिएको छ । पोष्टरमा अभिनेता आकाश श्रेष्ठ र नव-अभिनेत्री आश्मा गिरी रोमान्टिक मूडमा देखिएका छन् भने अर्का कलाकार विल्सन विक्रम राईलाई स्कुटर चलाइरहेको देख्न सकिन्छ ।
प्रेमकथानक चलचित्र ‘ड्रिम गर्ल’ मा सरोज खनाल, अर्जुन श्रेष्ठ, शिशिर भण्डारी, पूजा पराजुली, निर्मल शर्मा, लक्ष्मी गिरी,रश्मी भट्ट, सुरवीर पण्डितलगायतले अभिनय गरेका छन् । आरबि मुभीजको ब्यानरमा बनेको चलचित्रको निर्मातामा निर्देशक ऋषिराज, अर्जुन शर्मा र रामेश्वर घिताल छन ।
काठमाडौ, मुस्ताङ तथा थाइल्याण्डका बिभिन्न स्थानमा खिचिएको यस चलचित्रको सह-निर्मातामा दक्षिण भारतको रिल एण्ड रियल सिनेमा कम्पनी छ । राहुल राईले खिचेको चलचित्रमा अर्जुन पोखरेलको संगीत र गम्भीर बिष्टको कोरियोग्राफी छ । चलचित्र नवीन निरौलाले सम्पादन गरेका हुन् ।
निर्देशक ऋषिराजले ‘ड्रिम गर्ल’ को बिदेशमा निकै डिमाण्ड भएकाले पहिला देशबाहिर प्रदर्शन गर्न लागीएको जानकारी दिएका छन् । उनले भने, ‘चलचित्रको बिदेशबाट निकै माग आइरहेको छ । त्यसैले हामीले प्रदर्शन मिति केही पर सारेका हौं ।’