दुई युवा स्टार अनमोल केसी र प्रदीप खड्काको पहिलो पटक आमने-सामने भएको छ । बिहीवार राजधानीमा आयोजित ‘एनएफडिसी अवार्ड’ समारोहमा यी दुईको भेट मात्र भएन हात मिलाए र अंकमाल पनि गरे ।
मधुरो परिरहेको पानीमा दुई स्टार अभिनेता अवार्ड कार्यक्रममा पुग्दा सबै उनीहरुको भेट हुन्छ वा हुँदैन भन्ने जिज्ञासा बोकेर हेरिरहेका थिए । अन्ततः दुबैको बसाई एउटै रोहको कुर्सीमा भयो । दुबै एकअर्कालाई सजिलै देखिने ठाउँमा बसे ।
अनमोल र प्रदीप बसेको कुर्सीको बीचमा गोलो आकारको टेवुल थियो । केहीबेर अनमोल र प्रदीपले एकअर्कालाई देखेनन् । जब अनमोलले आफ्नो अपोजिटमा प्रदीपलाई देखे तब उनले ‘हाई’ भन्दै हात हल्लाए ।
प्रदीपले पनि ‘हाई’ भन्दै अनमोलसँग हात मिलाउन अगाडि बढे । प्रदीप उठेको देखेर अनमोलले पनि कुर्सी छाडेर अगाडि आए । अनि नेपालका दुई स्टार अभिनेताले पहिलो पटक हात मिलाए । कार्यक्रम हल तालीले गुञ्जियो । उक्त दृश्य कैद गर्न मिडियाका क्यामेराहरुमा थोरै थिएनन् ।
हात मिलाउँदै गर्दा प्रदीप र अनमोलले एकैचोटीमा ‘सन्चै’ भन्दै एकअर्काको बारेमा सोधे । दुबैले ‘आरामै’ रहेको इशारा गरे । अनमोलसँग हात मिलाएपछि प्रदीपले उनका पीता भुवन केसीलाई नमस्कार गर्दै अंकमाल गरे ।
केहीबेरमा एक सञ्चारकर्मीले दुबैलाई मिडियाका लागि सँगै तश्बिर खिचाउन आग्रह गरे । दुबैले केही अफ्ठ्यारो नमानी एकअर्कासँग अंकमाल गरे र झण्डै २ मिनेट तश्बिर खिचाए । अंकमाल गर्दैगर्दा दुबैको ओठमा मिठो मुस्कान देखिन्थ्यो ।
दुई स्टार अभिनेताको अंकमालले अवार्ड माहोल मज्जैले तातियो । अनमोल र प्रदीपको अंकमालले सकारात्मक सन्देश दिएको अवार्ड समारोहमा उपस्थित चलचित्रकर्मीहरु कानेखुसी गर्दै थिए ।
भिडियो :-