शुक्रबारबाट रिलिज हुन लागेको चलचित्र ‘लिलिबिली’ को मल्टिप्लेक्समा बुधवार दिउँसोबाट बुकिङ खुल्ला गरिएको छ ।
चलचित्रलाई क्युएफएक्स सिनेमाले मात्रै २५ शो दिएको छ । यस्तै, यसले बिग मुभिजमा ६ शो, सिने डि सेफमा ७ शो, विएसआर मुभिजमा ६ शो, एफक्यूबमा ६ शो, क्यूजमा ५ शो पाएको छ ।
सुरुवाती चरणको बुकिङ आक्रामक भएको खण्डमा चलचित्रको शोमा थप वृद्धि हुने निर्माण पक्षको भनाई छ ।
बुकिङ खुल्ला गरिएको केही घण्टामा नै मल्टिप्लेक्समा फिल्मको टिकट दर्शकले ‘रिजर्भ’ गर्न थालिसकेका छन् । मोफसल वितरणको जिम्मा लिएका मनोज राठीले चलचित्र पूर्वदेखि पश्चिमसम्मका सबै हलहरुमा रिलिज हुने जानकारी दिए ।
प्राप्त जानकारी अनुसार, यो चलचित्र काठमाडौं र मोफसल गरि ७५ बढी सिनेमा हलहरुमा प्रदर्शन हुँदैछ । युवा स्टार प्रदीप खड्काको क्रेज र चलचित्रको हाइपका कारण ‘लिलिबिली’ को इनिसियल व्यापार आक्रामक हुने धेरैको अनुमान छ ।
मिलन चाम्स निर्देशित यस चलचित्रमा प्रदीपका अलावा जसिता गुरुङ, प्रियंका कार्की, अनुपबिक्रम शाही, सविन श्रेष्ठ, मनिष श्रेष्ठ, ध्रुव दत्त, रितेश चाम्स लगायतका कलाकारको अभिनय छ ।
काफिया फिल्म्स्, सुदीप खड्का प्रोडक्सन र चाम्स इन्टरटेनमेन्टको व्यानरमा निर्माण भएको ‘लिलिबिली’ मा गोविन्द शाही, सुदिप खड्का र निर्देशक चाम्सको लगानी छ ।