‘जात्रा’ को सिक्वेल ‘जात्रै जात्रा’, कलाकार को-को ?

गएको वर्षको हिट चलचित्र ‘जात्रा’ को सिक्वेलको नाम ‘जात्रै जात्रा’ राखिएको छ । मंगलवार निर्देशक प्रदीप भट्टराई र निर्माता र कलाकार रविन्द्र सिंह बानियाँबीच ‘जात्रा’ को सिक्वेल निर्माण गर्ने औपचारिक सम्झौता भएको छ ।

फ्लोरमा जानु अगाडि नै यस चलचित्रको प्रदर्शन मिति वर्ष २०७५ को फागुन १७ गतेलाई तय गरिएको छ । निर्देशक भट्टराईले चलचित्रको निर्देशन गर्नेछन् भने कथा पनि उनकै रहनेछ ।

उनी निर्देशित नयाँ चलचित्र ‘शत्रु गते’ ले यतिबेला नेपाली बक्सअफिसमा एकपछि अर्को रेकर्ड बनाउँदै गएको छ । असार अन्तिमबाट उक्त चलचित्रको छायांकन सुरु हुने निर्देशक भट्टराईले जानकारी दिए ।

‘जात्रै जात्रा’ मा विपिन कार्की, वर्षा राउत, रविन्द्रसिंह बानियाँ, रविन्द्र झा लगायतका पुरानै कलाकारहरु दोहोरिने छन् भने केही नयाँ कलाकारको पनि अभिनय रहनेछ ।