चर्चित रियालिटी सो ‘हिमालय रोडिज’ को दोस्रो संस्करणको अडिसन बैशाख पहिलो साताबाट सुरु हुने भएको छ ।
हिमालय रोडिजको अडिसन इटहरीबाट सुरु हुने निर्देशक अमनप्रताप अधिकारीले जानकारी दिए ।
चितवनमा बैशाख १०, बुटवलमा बैशाख १२, पोखरामा बैशाख १५ र काठमाडौंमा बैशाख १८ गते अडिसन हुने जनाइएको छ ।
गत संस्करणमा अडिसनमा १० हजार प्रतियोगीले भाग लिएकामा अन्तिम चरणका लागि १८ जना छनोट गरिएको थियो ।
‘दोस्रो सिजन चुनौतीहरुले भरिएको छ र उत्तिकै मनोरञ्जनात्मक पनि छ। हामी एउटा समूहमा रुपमा नयाँ अध्यायका लागि निकै उत्साहित रहेका छौं,’ निर्देशक अधिकारीले भने ।
दिया मास्के, रेमण्ड दास श्रेष्ठ र आशिष राना ‘लाहुरे’ यस सिजनमा फेरि निर्णायकका रुपमा पुनरागमन गर्दैछन् । पहिलो संस्करणका विजेता समन श्रेष्ठ र उप–विजेता अनिमेश शाही यस पटकका कार्यक्रम सञ्चालक छन् ।
हिमालय रोडिजको दोस्रो संस्करणको विजेताले नगद २० लाख रुपैयाँ तथा एउटा यामाहा बाइक पुरस्कार प्राप्त गर्नेछन् ।