साम्राज्ञीको नजरमा यसकारण हेर्नुपर्छ ‘तिमीसँग’

नेपाली चलचित्र क्षेत्रकी चर्चित नायिका साम्राज्ञी राज्यलक्ष्मी शाह सुन्दरीसँगै क्रेज भएकी नायिकाको रुपमा चिनिन्छ । आर्यन सिग्देलको चलचित्र ‘कायरा’ मा १० लाख पारिश्रमिक लिएको चर्चाले उनी महंगी नायिकाको रुपमा छाएकी छिन् ।

साम्राज्ञीको दोस्रो चलचित्र ‘ए मेरो हजुर २’ हिट भएपछि उनको चर्चा झनै चुलिएको छ । उनी अहिले तेस्रो चलचित्र ‘तिमीसँग’ को रिलिज कुरेर बसेकी छिन्, जुन चैत २३ गतेबाट अल नेपाल प्रदर्शन हुँदैछ ।

उनी स्क्रिप्ट सुन्दा नै यस चलचित्रप्रति आकर्षित भएकी थिइन् । चलचित्रको कथा नै उनकै वरिपरि घुमेका कारण पब्लिसिटीमा आँखा झिम्काउन समेत यतिबेला उनलाई फुर्सद छैन ।

एक भेटको क्रममा उनले ‘तिमीसँग’ हेर्नुपर्ने तीन कारण खुलाएकी छिन् ।

‘एकदमै राम्रो चलचित्र बनेको छ’, ‘तीन जना पात्रको जीवनमा घट्ने कुरा हरेक मानिसको जीवनमा घटेको छ’ र ‘चलचित्रले मनोरञ्जन मात्र दिँदैन पाठ पनि सिकाउँछ’ उनी आफ्नो विचारमा ‘तिमीसँग’ हेर्नुपर्ने तीन कारण यीनै बताउँछिन् ।

शिशिर राणा निर्देशित उक्त चलचित्रमा नाजिर हुसेन र आकाश श्रेष्ठको पनि प्रमुख भूमिका छ ।

चलचित्रमा रोशन भट्टराईको एक्सन, कविराज गहतराज र रामजी लामिछानेको कोरियोग्राफी र सुशिल क्षेत्रीको छायांकन छ । शिशिर राणा, साकार ओझा, समुन्द्र उप्रेती र सुशिल क्षेत्रीको पटकथा चलचित्रमा छ ।