चैत ३० गतेबाट देशैभर प्रदर्शनमा आउन लागेको युवा स्टार प्रदीप खड्का अभिनीत चलचित्र ‘लिलिबिली’ को मोफसल टुर सकिएको छ । झन्डै पाँच दिने मोफसल टुर सकाएर ‘लिलिबिली’ टिम बिहीवार साँझ काठमाडौं ‘ब्याक’ भएको छ ।
चितवनबाट सुरु भएको चलचित्र को सांगीतिक रोड कन्सर्टको धमाल दमक, धरान र बिर्तामोडसम्म गुञ्जियो । जहाँ प्रदीपसँगै जसिता गुरुङ, निर्देशक मिलन चाम्स, निर्माता सुदिप खड्का, नेपाल आइडलका गायक प्रताप दास, गायक एसडी योगी र गायिका मेचु धिमालको उपस्थिति थियो ।
जहाँ-जहाँ कन्सर्ट गरिएको थियो त्यहाँ प्रदीपको एक झल्को हेर्नकै लागि हजारौं दर्शकको भीड जम्मा भएको थियो । ठूलोपर्दालाई प्राप्त तश्बिरमा पनि त्यो झलक हेर्न सकिन्छ । युवतीहरु ‘आई लभ यू’ भन्दै चिच्याउनेदेखि गुलाबको फूल बोकेर जर्बजस्ती स्टेज चढ्नेहरु प्रशस्तै थिए ।
‘प्रेमगीत’ को प्रेम आँखै अगाडि देख्दा कति युवतीले आँशु रोक्न सकेनन् । उनीसँग सेल्फी खिच्न पनि गज्जबकै लुछामारी भएको थियो ।
प्रदीप भन्छन्, ‘दर्शकको यो मायाले अत्यन्त खुसी छु । त्यो अपार मायामाथि कहिल्यै कुठाराघात हुनेखालको काम गर्ने छैन । जहाँ-जहाँ म पुगेँ त्यहाँका दर्शकहरु ‘लिलिबिली’ हेर्न इच्छुक भएको मैले पाएँ । फिल्मको गीतहरु समेत कन्ठ रहेछ । खुसी लाग्यो ।’
उता नव-अभिनेत्री जसिता पनि मोफसल टुरमा पाएको दर्शकको साथबाट उत्साहित भएको सुनाउँछिन् ।
मिलन चाम्स निर्देशित यस चलचित्रमा प्रदीप र जसिताका अलावा प्रियंका कार्की, अनुपबिक्रम शाही, सविन श्रेष्ठ, मनिष श्रेष्ठ, ध्रुव दत्त, रितेश चाम्स लगायतका कलाकारको अभिनय छ ।
काफिया फिल्म्स्, सुदीप खड्का प्रोडक्सन र चाम्स इन्टरटेनमेन्टको व्यानरमा निर्माण भएको ‘लिलिबिली’ मा गोविन्द शाही, सुदिप खड्का र निर्देशक चाम्सको लगानी छ । अर्जुन जिसीको सम्पादन, चन्द्र पन्तको एक्सन रहेको चलचित्रका छायाँकार सुदिप बराल हुन् ।