बबीको करिअर सुधार्दै सलमान

बलिउडका सुपरस्टार सलमान खान यतिबेला सनी देओलका भाई बबी देओलको करिअर सुधार्न लागीपरेका छन् ।

बबी ‘रेस ३’ मा सलमानसँग देखिँदैछन् । यस चलचित्रको सुटिङको क्रममा बबीको काम देखेर दबंग खान खुसी भएका थिए । खबरअनुसार, सलमानले आफ्नो नयाँ दुई चलचित्रमा उनलाई अनुवन्धित गर्ने तयारी थालेका छन् ।

सलमानको नयाँ चलचित्र ‘भारत’ र ‘किक २’ हो । केही हप्ता अगाडि ‘किक २’ को घोषणा गरिएको थियो र निर्माता साजिद नाडियाडवालाले यो चलचित्र अर्को वर्षको क्रिसमसमा रिलिज गर्ने जानकारी दिएका थिए ।

भारतीय मिडियाका अनुसार, सलमानले यस चलचित्रका लागि साजिदसँग बबीलाई लिनका लागि आग्रह गरेका छन् ।

यस्तै, सलमानको नयाँ चलचित्र ‘भारत’ मा पनि बबी देखिने सम्भावना प्रवल छ । उनले हालैमा बबी देओलका लागि चलचित्र ‘यमला पगला दीवाना फिर से’ का लागि एक स्पेशल गीतको सुटिङ गरेका थिए ।