गीतकै कारण व्यापारमा नयाँ किर्तिमान बनाएको चलचित्र ‘नाईं नभन्नु ल’ को पाँचौं सिक्वेल ‘नाईं नभन्नु ल ५’ को शनिवार शुभारम्भ पूजा गरिएको छ ।
मैतीदेवी मन्दिरमा निर्माण टिम र कलाकारको उपस्थितिमा चलचित्रको पूजाआजा गरिएको हो ।
चैत १२ गतेबाट छायांकन सुरु हुने चलचित्रलाई निर्देशक विकास राज आचार्यले निर्माण र निर्देशन गर्दैछन् । ‘नाईं नभन्नु ल ५’ मा अभिनेत्री प्रियंका कार्की र बाल कलाकार अनुभव रेग्मीको निरन्तरता रहनेछ ।
यस्तै, स्वस्तिमा खड्का, अभिषेक नेपाल, बुद्धि तामाङ, जयनन्द लामा, दिलिप रायमाझी, उत्तम केसी पनि चलचित्रमा प्रमुख भूमिकामा अनुवन्धित भएका छन् ।
निर्देशक आचार्यले अभिनेत्री केकी अधिकारी पनि चलचित्रमा भित्रिएको जानकारी दिए ।
उनले भने, ‘उहाँको विशेष भूमिका छ । स्क्रिप्ट सुनेपछि उहाँले एकै पटकमा चलचित्र गर्ने वचन दिनुभयो ।’ केकीको भूमिकाको विषयमा भने उनले केही खुलाउन चाहेनन् ।
वर्ष २०७५ को भदौ ८ गतेलाई प्रदर्शन मिति लक गरिएको यो चलचित्रमा प्रियंकाले स्वस्तिमाको आमाको भूमिका निर्वाहा गर्ने छिन् ।
‘नाईं नभन्नु ल ५’ मा बसन्त सापकोटाको संगीत, पुरुषोत्तम प्रधानको छायांकन, कविराज गहतराजको कोरियोग्राफी, अर्जुन जीसीको सम्पादन रहनेछ ।
सामिप्यराज तिमिल्सिना र विकास आचार्यको कथा, पटकथा तथा संवाद फिल्ममा छ ।