‘हाउसफुल ४’ मा भित्रिइन् कृति

‘हाउसफुल’ फ्रेन्चाइजीको तीन फिल्म बक्सअफिसमा सुपरहिट साबित भएको छ । फ्रेन्चाइजीको पछिल्लो तीन फिल्ममा अक्षय कुमार, रितेश देशमुख र ज्याकलीन फर्नान्डिज देखिएका थिए ।

आफ्नो पछिल्लो फिल्म ‘बरेली की बर्फी’ को सफलताबाट उत्साहित अभिनेत्री कृति सेनन अब फिल्म ‘हाउसफुल ४’ मा देखिने भएकी छिन् । कृति आफ्नो पहिलो फिल्म ‘हीरोपन्ती’ पछि फेरि एकपटक साजिद नाडियाडवालासँग फिल्म ‘हाउसफुल ४’ मा काम गर्दैछिन् ।

यो फिल्ममा कृति कमेडी गर्दै देखिनेछिन् । फिल्मको विषयमा उनले भनिन्, ‘हाउसफुल ४’ का कलाकारको टोलीमा सहभागी हुनु घर फर्किए झैँ लागेको छ । मेरो फिल्मी सफर ‘हीरोपन्ती’ मा साजिद सरसँग सुरु भएको थियो । अहिलेसम्म उहाँ सधै मेरो मार्गदर्शन बन्नुभएको छ । फेरि उहाँसँग काम गर्न आतुर छु । सफल ‘हाउसफुल’ फ्रेन्चाइजीको हिस्सा बनेर उत्साहित भएकी छु ।’

यो फिल्ममा अक्षय कुमार, रितेश देशमुख र बबी देओल जस्ता कलाकार देखिँदैछन् । ‘हाउसफुल ४’ साजिद नाडियाडवालाको नाडियाडवाला ग्रेन्डसन इन्टरटेनमेन्टको ब्यानरमा निर्माण हुनेछ । यो फिल्म वर्ष २०१९ को दिपावलीमा प्रदर्शन हुने पक्का भइसकेको छ ।