रुचाइयो ‘तिमीसँग’ को ट्रेलर

चैत २३ गतेबाट देशव्यापी प्रदर्शनमा आउन लागेको प्रतिक्षीत चलचित्र ‘तिमीसँग’ को ट्रेलरले यतिबेला दर्शकबाट निकै राम्रो प्रतिक्रिया पाइरहेको छ ।

प्रेम, रोमान्स, विछोड र कमेडी मिश्रित ट्रेलर युट्युब रिलिजको एक हप्तामा ५ लाख ७८ हजार बढी पटक हेरिएको छ ।

१२ हजार लाइक्स मिलेको ट्रेलरको कमेन्ट बक्समा अधिकांशले तारिफको शब्द कोरेका छन् ।

केहीले साम्राज्ञीलाई ‘नेपालको नम्वर वान नायिका’ भनेर लेखेका छन् त कतिले अभिनेता आकाश श्रेष्ठ ‘मन पर्‍यो’ भन्दै कमेन्ट लेखेका छन् ।

प्रायः अधिकांशले भने अभिनेता नाजिर हुसेनको तारिफ गरेका छन् । ११ सयभन्दा बढी कमेन्टमा नाजिरलाई निकै राम्रो कमेन्ट प्राप्त छ । कमेन्टमा श्रद्धा तिमल्सिना लेख्छिन्, ‘नाजिर, हजुरलाई हेर्न भए नी चलचित्र हेर्न जान्छु ।’

विमला तामाङले ‘ग्रेट नाजिर’ भन्दै कमेन्ट गरेकी छिन् । यस्ता सयौं कमेन्ट नाजिरका लागि लेखिएका छन् । ट्रेलरमा उनले बोलेका केही ‘कमेडी पञ्च लाइन’ ले चलचित्रप्रति दर्शकमा झनै उत्सुकता जगाइदिएको छ ।

नेपालको युट्युब ट्रेन्डिङको ‘नम्वर वान’ मा पर्न नसकेपनि ‘तिमीसँग को ट्रेलर ट्रेन्डिङको लिस्टबाट भने बाहिरिएको छैन । अहिले चलचित्रको ट्रेलर नेपालको युट्युब ट्रेन्डिङको २७ औँ स्थानमा छ ।

शिशिर राणा निर्देशित उक्त चलचित्रले विदेशबाट घुम्न आएकी एक युवतीसँग दुई पुरुष पात्रको रमाइलो जर्नीको कथा वाचन गरेको छ ।

चलचित्रमा रोशन भट्टराईको एक्सन, कविराज गहतराज र रामजी लामिछानेको कोरियोग्राफी र सुशिल क्षेत्रीको छायांकन छ । शिशिर राणा, साकार ओझा, समुन्द्र उप्रेती र सुशिल क्षेत्रीको पटकथा चलचित्रमा छ ।