आफ्नो अनुहारमा कुकुर मिक्स हुँदा दीपक अचम्मित

हास्यकलाकार दीपकराज गिरी अभिनीत नयाँ चलचित्र ‘शत्रु गते’ चैत ९ गतेबाट देशव्यापी प्रदर्शनमा आउँदैछ । उक्त चलचित्रमा अभिनेत्री प्रियंका कार्कीसँग दीपकराजको जोडी बाँधिएको छ ।

चलचित्रको ट्रेलरको एक दृश्यमा उनको अनुहारमा कुकुर मिक्स गरिएको छ र लेखिएको छ, ‘कुकुरदेखि होसियार ।’ यो सिन यतिबेला सामाजिक सञ्जालमा खुब भाइरल बनेको छ । धेरै ट्रोल समेत बनेका छन् ।

आइतवार चलचित्रको विषयमा जानकारी दिन आयोजित पत्रकार भेटघाटमा दीपकराजले आफ्नो टाउकोमा कुकुरको अनुहार मिक्स हुँदा आफैं अचम्ममा परेको सुनाए ।

उनी भन्छन्, ‘दीपकले के भन्छ भनेर सायद यो कुरामा डाइरेक्सन टिम पनि अफ्ठ्यारो मानिरहेको छ होला । मेरो थोप्डामा कुकुर मिक्स हुन्छ भनेर मलाई नै थाहा थिएन । त्यो पहिलो स्क्रिप्टमा थिएन । पछि उहाँहरुले क्रियटिभिटीमा काम गर्दागर्दा मेरो अनुहारमा कुकुर मिक्स गर्नुभएछ ।’

उनले आफ्नो टाउकोमा कुकुर मिक्स हुँदा राम्रो देखिएको पनि बताए । उनी हँसिलो मुद्रामा अगाडि थप्छन्, ‘त्यो सबैलाई सुहाउँदैन । कुकुर भनेको इमान्दारिताको प्रतिक पनि हो । फिल्मको काममा मलाई जे बनाए पनि म खुसी हुन्छु ।’

उनी ‘शत्रु गते’ मा अभिनेता पल शाह र अभिनेत्री आँचल शर्माको प्रेममा भिलेन बनेका छन् । तर, दीपकराज चलचित्रमा भिलेन बलियो नभएसम्म चलचित्र बलियो नहुने तर्क राख्छन् ।

प्रदीप भट्टराई निर्देशित यस चलचित्रमा दीपकसँगै पल शाह, आँचल शर्मा, हरिवंश आचार्य, दीपाश्री निरौला, प्रियंका कार्की, मदनकृष्ण श्रेष्ठ, किरण केसी, शिवहरी पौडेल, राजाराम पौडेल, बसुन्धरा भुषाललगायतको पनि अभिनय छ ।