चैत ९ गतेबाट देशव्यापी प्रदर्शनमा आउन लागेको चलचित्र ‘शत्रु गते’ को प्रचारमा व्यस्त अभिनेत्री आँचल शर्माले चलचित्रमा कहिल्यै चुम्बन र बेडसिन नदिने अठोट लिएकी छिन् ।
उनी भन्छिन्, ‘मैले आजसम्म कुनै चलचित्रमा न चुम्बन न त बेडसिन नै दिएकी छु । र, भोलीका दिनमा पनि दिन्नँ ।’
एकपछि अर्को चलचित्रमा अभिनेता पल शाहसँग काम गर्दा उनीहरुको प्रेम सम्बन्धको हल्ला सिनेवृतमा दिन प्रतिदिन फस्टाउँदै गएको छ । पटक-पटक यो कपलले आफूहरु साथी मात्र रहेको बताउँदै आएका छन् ।
आइतवार पत्रकारसँगको कुराकानीमा आँचल थप्छिन्, ‘धन्न ! मेरो धेरै हिरोसँग नाम जोडिएन । तर पल र म मात्र मिल्ने साथी हौं ।’
‘दुःख लाग्छ केहीले मलाई पलको गलफ्रेण्ड भनेर भन्नुहुन्छ । हामी दुईलाई थाहा छ हामीबीच प्रेम छैन । त्यसैले अब त यो कुरा सामान्य लाग्न थालिसकेको छ ।’ उनी भन्छिन् । आँचलले फिल्म ‘शत्रु गते’ बाट आफूले ठूलो आश गरेको पनि बताइन् ।
चलचित्रमा हरिवंश आचार्य, दीपाश्री निरौला, दीपकराज गिरी, प्रियंका कार्की, मदनकृष्ण श्रेष्ठ, किरण केसी, शिवहरी पौडेल, राजाराम पौडेल, बसुन्धरा भुषाललगायतको पनि अभिनय रहेको छ ।
प्रदीप भट्टराई निर्देशित ‘शत्रु गते’ लाई मह सञ्चारको ब्यनारमा निर्माण गरिएको छ भने, यसका प्रस्तुतकर्ता किरण केसी हुन् । चलचित्रमा हरिवंश आचार्यको कथा रहेको छ ।
पटकथालाई निर्देशक भट्टराई र दीपकराज गिरी तथा संवाद भने निर्देशक भट्टराईले कथाकार हरिवंश आचार्यसँग मिलेर तयार गरेका हुन् । यसमा छायांकन दिर्घ गुरुङको रहेको छ भने सम्पादन मित्र गुरुङले गरेका हुन् ।
दीपकराज गिरी, दीपाश्री निरौला, नरेन्द्र कंसाकार, शिवहरी पौडेल, यसोधा श्रेष्ठ र रमिला आचार्य चलचित्रको निर्मातामा रहेका छन् ।