शुक्रवार राजधानीमा एक कार्यक्रमका विच चलचित्र ‘डमरुको डण्डीबियो’ को ‘तितेताते तितेताते झ्याप झ्याप’ बोलको गीत सार्वजनिक भएको छ । गीतमा फिल्मका प्रमुख कलाकारहरु फिचरिङ छन् ।
कालीप्रसाद बाँस्कोटाको स्वर र संगीत रहेको गीतको शब्द एकतारे, काली र हर्क साउदले लेखेका हुन् । चलचित्रको कथा अनुसार आफूले गीत तयार पारेको कार्यक्रममा कालीले बताए ।
गीतमा खगेन्द्र लामिछाने, मेनुका प्रधान, वुद्धि तामाङ, लक्ष्मी बर्देवालाई डण्डीबियो सिक्दै गरेको देख्न सकिन्छ । कलाकार अनुप बराल डण्डीबियो प्रशिक्षकको भूमिकामा देखिएका छन् ।
फयामिली स्पोर्टस् ड्रामा जनरामा तयार पारिएको उक्त चलचित्रमा अंकित खड्का, अशान्त शर्मा, मिश्री थापा, नमिता घिसिङ, इंगि होपू कोइंच सुनुवारलगायतका कलाकारहरुको पनि अभिनय छ ।
समृद्धि इन्टरटेन्मेन्टको ब्यानरमा विनोद गुरुङ र नोर्बु छिरिङ घलेको लगानीमा निर्माण भएको यो चलचित्रको ७५ प्रतिशत छायांकन लमजुङको घले गाउँ र बाँकी काठमाडौंमा भएको हो ।
छेतेन गुरुङको निर्देशन रहेको ‘डमरुको डण्डीबियो’ को कथा कलाकार खगेन्द्र आफैंले लेखेका हुन् । यो चलचित्र वर्ष २०७५ को बैशाख २१ गतेबाट देशभर प्रदर्शनमा आउँदैछ ।
प्रितम पाण्डेको सम्पादन, कालीप्रसाद बाँस्कोटाको संगीत, रिकेश गुरुङ, विद्या तिवारी र कालीको गायन रहेको चलचित्रलाई हरी हुमागाइँले खिचेका हुन् । नेपालमा लोप हुँदै गएको डण्डीबियोको कथालाई चलचित्रमा उतारिएको छ ।