फागु पुर्णिमा होलीको अबसर पारेर चलचित्र ‘भोर’ को फस्टलुक पोष्टर रिलिज गरिएको छ । तराई भेगमा विद्धमान दाइजो प्रथाको यथार्थ कथालाई पर्दामा उतार्न खोजेको निर्माण टिमले पोष्टर रिलिजसँगै प्रदर्शन मिति पनि घोषणा गर्यो । चलचित्र आगामी बैशाख २१ बाट सार्वजनिक प्रदर्शनमा आउने भएको छ ।
सार्वजनिक पोस्टरमा लिड अभिनेत्री डली सरकार बेहुलीको भेषमा प्रस्तुत छिन् । जनकपुरमा परस्परागत रुपमा फागु पुर्णिमाको छेकोमा हुँदै आएको महामुर्ख सम्मेलनमा ‘झोला’ निर्देशक यादवकुमार भट्टराईले चलचित्रको पोष्टर र रिलिज मिति घोषणा गरे ।
निर्देशक भट्टराईले दाइजोलाई महिला हिंसाको रुपमा नलिएर मानव हिंसाको रुपमा लिनु पर्ने भन्दै यो पटक पनि नेपाली समाजको यथार्थतालाई लिएर दर्शकमाझ आउन लागेको बताए ।
कृष्ण धाराबासीको लेखनमा तयार भएको चलचित्रमा रामनारायण ठाकुर, अनिता रानी मण्डल, राजेश सक्सेना, बि एन पटेल, डली सरकार, प्रमेश झा, बटुक राज मिश्र, अनिता देव, पुजा कर्ण लगायत कलाकारहरु प्रमुख अभिनयमा छन् ।
चलचित्रका कार्यकारी निर्माता देबेन्द्र प्रसाद सुवेदी हुन् । चलचित्रमा किसन अर्यालको मुख्य सहायक निर्देशन छ । दिपक बज्राचार्यले छायांकन गरेको चलचित्र ‘भोर’ का निर्माता राज तिमल्सिना र राम गोपाल थापा हुन् ।