‘शत्रु गते’ पोस्टरमा हेर्नुस् कसको जोडी को ?

चलचित्र ‘शत्रु गते’ को पोस्टर सार्वजनिक गरिएको छ । चलचित्रको रिलिजको लागि एक महिनाको समय बाँकी रहँदा निर्माण युनिटले पोस्टर सार्वजनिक गरेको हो । सार्वजनिक पोस्टरमा चलचित्रमा देखिने जोडीलाई नै समेटिएको छ ।

सार्वजनिक गीतमा देखिएको जोडी कै आधारमा पोस्टर तयार गरिएको छ । सार्वजनिक पोस्टरमा हरिवंश आचार्य र दीपाश्री निरौला, दीपकराज गिरी र प्रियंका कार्की तथा पल शाह र आँचल शर्माको जोडी देखाइएको छ ।

थिम अनुसार नै चलचित्रको पोस्टर तयार गरिएको निर्देशक प्रदिप भट्टराईले बताए । श्रीधर पौडेलको फोटोग्राफी रहेको यस पोस्टरलाई टौवा क्रिएसनका लागि विजय बस्याल र शान थापाले तयार गरेका हुन् ।

चलचित्रमा मदनकृष्ण श्रेष्ठ, किरण केसी, शिवहरी पौडेल, राजाराम पौडेल, बसुन्धरा भुषाललगायतको पनि अभिनय रहेको छ । चलचित्रको सार्वजनिक पहिलो गीत ‘रुपै मोहनी’ ९४ लाख पटक युट्युबमा हेरिसकिएको छ भने दोस्रो सार्वजनिक गीत ‘पिरतीको बर्को’ लाई पनि दर्शकले रुचाइरहेका छन् ।

चलचित्रलाई मह सञ्चारको ब्यनारमा निर्माण गरिएको छ भने यसका प्रस्तुतकर्ता किरण केसी हुन् । चलचित्रमा हरिवंश आचार्यको कथा रहेको छ । पटकथालाई निर्देशक भट्टराई र दीपकराज गिरी तथा संवाद भने निर्देशक भट्टराईले कथाकार हरिवंश आचार्यसँग मिलेर तयार गरेका हुन् ।

चलचित्रमा छायांकन दिर्घ गुरुङको रहेको छ भने सम्पादन मित्र गुरुङले गरेका हुन् । यसमा दीपकराज गिरी, दीपाश्री निरौला, नरेन्द्र कंसाकार, शिवहरी पौडेल, यसोधा श्रेष्ठ र रमिला आचार्य निर्माता रहेका छन् । चलचित्र चैत्र ९ मा रिलिज हुनेछ ।