शुक्रवारबाट देशव्यापी प्रदर्शनमा आएको युवा स्टार अनमोल केसी स्टारर चलचित्र ‘कृ’ को स्पेशल स्क्रिनिङ गरिएको छ । आइतवार साँझ कुमारी हलमा आयोजना गरिएको प्रिमियर शैलीको विशेष शो मा चलचित्रकर्मी, पत्रकार र विभिन्न संघ-संस्थाका व्यक्तिसँगै अनमोलका फ्यानहरु पनि उपस्थित थिए ।
टाटा कम्पनीको ट्यागोर गाडीमा साँझ करीब साढे ६ बजे कुमारी हल पुगेका अनमोलको एक झल्को हेर्न केही युवतीहरु कलेज ड्रेसमै हातमा गुलाबको फूल बोकेर बसेका थिए ।
युवतीहरु ‘आई लभ यू अनमोल’ भन्दै रुन थालेपनि अनमोलले आफ्ना फ्यानलाई अंगालो मारे । ६ जना बडिगार्डले उनलाई सुरक्षा दिएका थिए ।
नव-नायिका अदिती बुढाथोकीका इन्स्टाग्राम फ्यानहरु पनि ‘कृ’ को स्पेशल स्क्रिनिङमा पुगेका थिए । यस्तै, नायक अनुप विक्रम शाही आफ्ना फ्यानहरुसँग केहीबेर सेल्फीमा रमाए ।
‘कृ’ हेरिसकेपछि सरोज खनाल, शोभित बस्नेत, नरेन खड्का, किरण केसी, सिताराम कट्टेल, कुञ्जना घिमिरे, सञ्चारकर्मी रवि लामिछाने, भुवन चन्द, प्रदीप भट्टराई लगायतका चलचित्रकर्मीहरुले चलचित्रको तारिफ गरे ।
छायांकन, मेकिङ र द्वन्द्व निर्देशनको पक्षलाई सबैले अब्बल माने । अनमोलको क्यूटनेशको तारिफ भयो । अनुप र अदितीको अभिनयलाई उत्कृष्ट भने ।
दोस्रो पटक चलचित्र हेरेका अनमोल र अदितीले सबैबाट पाएको राम्रो प्रतिक्रियाबाट उत्साहित भएको सुनाए । निर्माता द्वय भुवन केसी र सुवास गिरीले स्पेशल स्क्रिनिङमा चलचित्रले पाएको उत्कृष्ट प्रतिक्रियाले उर्जा थपेको बताए ।
यस्तै, निर्देशक सुरेन्द्र पौडेलले आफ्नो मिहिनेतलाई रुचाएकोमा सबैलाई धन्यवाद दिए । सुवास इन्टरटेन्मेन्टको निर्माणमा द सुपर काजोल फिल्मस्को प्रस्तुतीमा यो चलचित्र तयार भएको हो ।
चलचित्रमा अनमोल केसी, अदिती वुढाथोकी, अनुपविक्रम शाही, कामेश्वर चौरासिया, सरोज खनाल, रुपा राना, लक्ष्मी गिरी, अमित गिरी, सुदाम लगायतका कलाकारको मुख्य भूमिका छ ।
चलचित्रमा कथा, सम्पादन र निर्देशन सुरेन्द्र पौडेलको छ । चलचित्रमा चन्द्र पन्तको एक्सन, अल्मोडा राना उप्रेती र विशेष श्रेष्ठको संगीत, पुरुषोत्तम प्रधानको छायांकन, प्रदिप भारद्धाज र आशिष रेग्मीको पटकथा तथा संवाद, रेनशा वान्तवा राइको कोरियोग्राफी छ ।
भिडियो :-