वर्ष २०७३ को हिट चलचित्र ‘जात्रा’ को सिक्वेल निर्माण हुने भएको छ । पुरानै टीमले निर्माण गर्ने ‘जात्रा २’ लाई प्रदीप भट्टराईले निर्देशन गर्नेछन् । चलचित्रको कथा पनि निर्देशक भट्टराईको नै हुनेछ । प्राप्त जानकारी अनुसार, ‘जात्रा २’ को छायांकन वर्ष २०७५ को जेठ पहिलो साताबाट सुरु हुनेछ ।
निर्देशक भट्टराईले भने, ‘अहिले हामी चलचित्रको सुरुवात चरणमा छौं । ‘जात्रा’ जहाँबाट अन्त्य भएको थियो चलचित्र त्यहीबाट सुरु हुन्छ । तर, कथा भने नयाँ हुनेछ ।’ उनका अनुसार, ‘जात्रा’ को सिक्वेलमा पुरानै कलाकारहरु दोहोरिने छन् ।
शुक्रवार साँझ ‘जात्रा’ युट्युबमा रिलिज हुँदैछ । ‘जात्रा’ को सिक्वेलमा पनि वर्षा राउत, विपिन कार्की, रविन्द्र सिंह बाँनिया, रविन्द्र झा लगायतका कलाकारहरुको नै मुख्य भूमिका हुने निर्देशक भट्टराईले जानकारी दिए ।
चलचित्रमा नयाँ कलाकारहरुको पनि अभिनय रहनेछ । रविन्द्र सिंह बाँनियाले चलचित्र निर्माण गर्नेछन् ।