नायक देवय सौगात मल्ल र विपिन कार्की स्टारर चलचित्र ‘लालपुर्जा’को राजधानीमा विशेष शोको आयोजना गरिएको छ । बिहीवार साँझ क्यूज सिनेमा हलमा भएको विशेष शोमा चलचित्रले प्रशंसाको आहिरो कमाएको छ । कलाकारदेखि निर्देशकसम्मको सबैले तारिफ गरे । मौलिक कथावस्तुमा निर्माण भएका कारण पनि चलचित्रले राम्रो रेस्पोन्स पाएको छ ।
जग्गाका लागि दुई दाजु-भाईको झगडाको कथा बोल्ने यो चलचित्र हेर्न पूर्वमिस नेपाल तथा सौगातकी प्रेमिका सृष्टि श्रेष्ठ पनि पुगेकी थिइन् । चलचित्र हेरेपछि सञ्चारकर्मीसँग संक्षिप्त कुराकानी गर्दै उनले आफ्नो प्रेमी सौगातको तारिफ गर्न छुटाइनन् । उनले भनिन्, ‘सौगातको अभिनय बेष्ट । विपिनको अभिनय पनि निकै राम्रो लाग्यो । समग्रमा चलचित्र हेर्न लायकको बनेको छ ।’
शुक्रवारबाट राजधानीका हलहरुमा प्रदर्शन हुने चलचित्रमा नायिका सृष्टिको पनि केमियो छ । बिहीवारबाटै यो चलचित्र मोफसलका हलहरुमा भने प्रदर्शन सुरु भइसकेको छ । निगम श्रेष्ठले निर्देशन गरेको चलचित्रमा विक्रम सिंह थारु र उमेश श्रेष्ठ निर्माता रहेका छन् ।
‘लालपुर्जा’मा सौगात मल्ल, विपिन कार्की, मिरुना मगर, मेनुका प्रधान, हरिहर शर्मा, कामेश्वर चौरसिया र कुमार नगरकोटी लगायतका कलाकारहरुको मुख्य भुमिका रहेको छ ।
नेगेटिभ बुद्ध ब्यानरमा निर्माण भएको चलचित्रमा नरेन्द्र मैनालीको छायांकन र लोकेश बज्राचार्यको सम्पादन रहेको छ ।
भिडियो :-