शुक्रवारबाट प्रदर्शनमा आएको चलचित्र ‘मिस्टर झोले’को पाँच दिने कलेक्सन रिपोर्ट सार्वजनिक भएको छ । वितरक गोविन्द शाहीले फिल्मको ५ दिने कलेक्सन २ करोड २२ लाख रहेको जानकारी दिएका छन् । उनका अनुसार, प्रदर्शनको दुई दिनमा १ करोड १० लाख कलेक्सन गरेको चलचित्रले बाँकी ३ दिनमा १ करोड १२ लाख कमाउन सफल भएको छ ।
छैटौं दिनसम्म आईपुग्दा पनि दर्शक चापमा कमी नआएको निर्माता टेकेन खड्का बताउँछन् । उनले भने ‘देशका केही मुख्य स्टेशन बुधवार पनि हाउसफुल थिए । विहिबार सोनम ल्होसारको विदामा अझ दर्शक बढ्नेमा आशावादी छौं ।’
रामबाबु गुरुङ निर्देशित चलचित्र ‘मिस्टर झोले’मा दयाहाङ राई, वर्षा राउत, दीया पुन, प्रविण खतिवडा, वृद्धि तामाङ, पुष्कर गुरुङ, अरुणा कार्की, कमलमणी नेपाल, लक्ष्मी वर्देवा, सरोज अर्याल लगायतका कलाकारहरुको अभिनय छ ।
यो चलचित्रलाई टेकेन खड्का प्रोडक्सन र सिनेमा आर्टले संयुक्त रुपमा निर्माण गरेको हो । यसअघि निर्देशक गुरुङ्गले ‘कबड्डी’, ‘कबड्डी कबड्डी’, ‘पुरानो डुंगा’ जस्ता चलचित्रहरु निर्देशन गरेका थिए ।