ठुलोपर्दा डटकम।
चैत ५ गतेबाट देशव्यापी प्रदर्शनमा आउन लागेको चलचित्र ‘भाग् सानी भाग्’ यूनिटले आफ्नो प्रचार प्रसारलाई यति बेला आक्रमक बनाइरहेको छ । पोखराबाट देशदौडाह सुरु गरेको चलचित्र यूनिट अहिले पूर्व पुगेको छ । पोखराबाट नारायणगढसम्म चलचित्रका नायक सविन श्रेष्ठ र नायिका केकी अधिकारी पनि प्रचार प्रसारमा साथ दिएका थिए भने अहिले पूर्वका केहि जिल्लाहरुमा भने चलचित्रका दुई निर्माता चेतन सापकोटा र सहदेव गौतमसँगै चलचित्रका निर्देशक नवल नेपालले चलचित्रको प्रचार प्रसारलाई व्यापकता दिएका छन् ।
उनीहरुले केहि दिन अगाडी पूर्वको दमक र धरानमा पत्रकार सम्मेलन गरि चलचित्रको विषयमा जानकारी गराएका थिए । यस चलचित्रमा केकी अधिकारी, सविन श्रेष्ठ, निर शाह, लय संग्रौला, रमेश वुढाथोकी, गिता अधिकारी, रविन्द्र खड्का, विष्णु सापकोटाको मुख्य भूमिका रहेको छ । रंगीन सपना बोकेर गाउँबाट शहर पसेका एक जोडी युवा युवतीको संघर्षको कथालाई चलचित्रमा उतारिएको बताईएको छ ।
साथीभाई फिल्मस्का लागि बिष्णु चापागाँईको प्रस्तुतीमा बनेका यो चलचित्रमा कविराज गहतराजको नृत्य, हिमाल केसीको एक्सन, दिव्यराज सुवेदीको छायांकन रहेको छ । चलचित्रमा सहदेव गौतम र विलोल पोख्रेल निर्माताको रुपमा छन् ।