ठुलोपर्दा डटकम, काठमाण्डौ।
नायिका करिश्मा मानन्धरले १२ बर्षपछि निर्माण गरेको चलचित्र ‘फागु’ र अनिल थापा निर्देशित “को आफ्नो” आजबाट एकसाथ प्रदर्शनमा आएका छन् । यी दुबै चलचित्रमा नारी पात्रलाई मुख्य भुमिकामा प्रस्तुत गरिएको छ ।
करिश्मा मानन्धरको निर्माण रहेको फागु चलचित्रमा शिल्पा पोखरेल प्रमुख भुमिकामा प्रस्तुत भएकी छिन् भने को आफ्नोमा ऋचा शर्मालाई मुख्य भुमिकामा प्रस्तुत गरिएको छ । नारी प्रधान चलचित्र फागुमा शिल्पा पोखरेल एक्सन भुमिकामा प्रस्तुत हुँदै छिन् । शिल्पा पोखरेल छविराज ब्यानरबाट उदाएकी नायीका हुन् ।
उनले यस अघि “लज्जा” र “हवल्दार सुन्तली” मा अभिनय गरेर प्रशंसा कमाएकी नायिका हुन् । त्यसै गरि ऋचा शर्मा ओस्कर सम्म नेपालको प्रतिनिधीत्व गरेको “टंकराज भर्सेज टुल्के” बाट राष्ट्रिय पुरस्कार पाएकी नायिका हुन् । चलचित्र ‘फागु’ मा गौरी मल्ल, बसन्त भट्ट, राजेश हमाल, शिल्पा पोख्रेलको साथमा नव कलाकार सुवास पराजुलीको मुख्य भूमिका रहेको छ भने चलचित्रलाई निर्देशक संझना रौनियारले निर्देशन गरेकी हुन् ।
त्यस्तै चलचित्र “को आफ्नो”मा ऋचा शर्माका अलवा संशाक मैनाली, सुवास थापा, मेनुका प्रधान, सुदाम सिके, राजन खतिवडा, शान्ति गिरी, सुलक्षण भारती लगायतका कलाकारहरु देखिएका छन् ।