सुष्मालाई सुस्तरीको आश, चम्केला त करियर ?

अभिनेत्री सुष्मा कार्कीले अभिनय गरेको चलचित्र ‘चलेछ बतास सुस्तरी’ २९ माघमा रिलिज हुँदैछ । यो उनको निकै लामो समयपछि प्रदर्शनमा आउन लागेको चलचित्र हो ।

नेपाली चलचित्रको पर्दामा खासै जम्न नसकेकी सुष्मा यो चलचित्रबाट निकै आशावादी छिन् । ‘गुरुदक्षिणा’, ‘के यो माया हो’, ‘ब्याच नं १६’, ‘मेरो जीवन साथी’, ‘पाप’, ‘बाउन्सर’, ‘विन्दास’, ‘विन्दास–२’ लगायतका चलचित्रमा अभिनय गरेकी उनी बीचमा आइटम डान्सरका रूपमा परिचित भएकी थिइन् । उनले ‘लुट’ चलचित्रमा गरेको आइटम डान्सले निकै चर्चा पाएको थियो ।

पछिल्लो समय चलेछ बतास सुस्तरीका गीत र प्रोमो पाएको सकारात्मक चर्चाले सुष्मालाई निकै आशावादी बनाएको छ । प्रदीप भारद्वाजको लेखन र निर्माणमा बनेको फिल्ममा सुष्माका साथमा प्रमोद भारद्वाज प्रमुख भूमिकामा छन् ।