ठुलोपर्दा डटकम, काठमाण्डौ।
अनमोल केसीले अभिनय गरेका जम्मा दुईवटा चलचित्र ‘होस्टल’ तथा ‘जेरी’ प्रदर्शन भएका छन् । दुवै चलचित्र व्यवसायिक रूपमा सफल भए ।
ती चलचित्रको व्यवसायिक सफलतासँगै अनमोलमा माग ह्वात्तै बढ्यो । आफ्नै बुवा भुवन केसीको ‘ड्रिम्स’ अनमोलको तेस्रो चलचित्र हो भने ‘गाजलु’को भर्खरै छायांकन सम्पन्न भएको छ । ‘गाजलु’ बाट १० लाख रुपैयाँ पारिश्रमिक लिएर अनमोलले एउटा कीर्तिमान पनि कायम गरेका छन् ।
आगामी दिनमा अनमोलले ‘गाजलु’ को भन्दा कम पारिश्रमिकमा काम गर्लान् कि नगर्लान् ? साप्ताहिकसँगको कुराकानीमा अनमोल भन्छन्— ‘योचाहिँ भविष्यको कुरा हो, जसका बारेमा अहिले नै केही बताउन सकिंदैन ।’ जेरीको सफलतापछि अनमोलले झन्डै तीन दर्जन चलचित्रबाट अभिनयको प्रस्ताव पाए ।
‘मैले ३३ वटा चलचित्र अस्विकार गरेँ, अनमोल भन्छन्— ‘अधिकांश चलचित्रको विषय तथा मैले निर्वाह गर्नुपर्ने भूमिका मन नपरेका कारण ती चलचित्र छाडेँ ।’