ठुलोपर्दा डटकम, काठमाण्डौ।
अभिनेता भुवन केसी निर्देशित एंव निर्मित चलचित्र ‘ड्रिम्स’ को पहिलो अफिसियल ट्रेलर र गीत सार्वजनिक गरिएको छ । काठमाण्डौमा सोमबार आयोजित पत्रकार सम्मेलनमा चलचित्रको गीत र ट्रेलर सार्वजनिक गरिएको हो ।
‘होस्टेल’ र ‘जेरी’ चलचित्रबाट दर्शक माझ स्टार नायकको रुपमा छवि बनाएका अनमोल केसीले अभिनय गरेको चलचित्र ‘ड्रिम्स’को ट्रेलरमा एक्शन, रोमान्स, इमोशन सबैपक्षलाई उत्कृष्ट तरिकाले समेटिएको छ । कार्यक्रममा बोल्दै चलचित्रका निर्देशक एवं निर्माता भुवन केसीले आफुले चलचित्र ‘ड्रिम्स’ हलीउड र बलीउड चलचित्रसँग तुलना गर्न मिल्ने बनाएको दाबी गरे ।
उनले भने -‘मैले चलचित्र ‘ड्रिम्स’लाई हलीउड र बलीउड चलचित्रसँग तुलना गर्न मिल्ने बनाएको छु त्यसैले म ढुक्कसँग भन्न सक्छु चलचित्रलाई दर्शकहरुले मनपराउनेछन् ।’ उनले सबै नेपाली चलचित्र चल्नुपर्ने बताए । यो चलचित्रमा अनमोलसँगै साम्राज्ञीराज्य लक्ष्मी शाह, सन्ध्या केसीको मुख्य भुमिका रहेको छ । चलचित्रमा दर्शना केसी, अमित श्रेष्ठ, न्यान्सी थापा पनि मुख्य भूमिकामा छन् ।
त्यस्तै कार्यक्रममा बोल्दै चलचित्रका नायक अनमोल केसीले चलचित्र ‘ड्रिम्स’ले प्रेमकथा बोलेको बताए ।
चलचित्रमा सामीप्यराज तिमल्सेनाको पटकथा, पुरुषोत्तम प्रधान र सन्जय लामाको छायांकन, हरकलश बस्नेत र विशेष पाण्डेको संगीत, बनिश शाह र मिलन श्रेष्ठको सम्पादन, चन्द्र पन्तको द्धन्द्ध, कविराज गहतराजको नृत्य निर्देशन रहेको छ । आउँदो फागुन २१ मा देशव्यापी रिलिज गरिने तयारी गरिएको यो चलचित्र प्रेम कथामा आधारित रहेको बताइएको छ ।
ट्रेलर हेर्नुहोस्: